KI-senter: Møteplass for søkjarar

Forskingsrådet inviterer til møteplassar, slik at aktuelle søkjarar og partnarar kan vidareutvikle skisser (senterforslag) og finne saman i gode konsortium. 

Innan møtet 27.-28 aug. skal alle innsende skisser ha fått tilbakemelding og tips/råd om eventuelle forbetringar. Ut frå dei 122 skissene skal det etablerast fire til seks KI-senter. Det er eit stort spenn i skissene med alt frå forskingskonsortium som er nesten ferdig utvikla til skisser på idéstadiet med senter-potensial, eller som eit case i eit KI-senter. 

• Les meir om satsinga på kunstig intelligens

Mange blir rådde til å inngå meir samarbeid med andre relevante forskingsinstitusjonar eller andre relevante aktørar. Andre bør gå saman med ein eller fleire KI-senterskisser.

Denne møteplassen er eit godt høve til å finne samarbeidspartnarar og starte arbeidet med hovudsøknaden.

Målgruppa for møtet er

• Representantar for KI-senterinitiativ som søkjer etter partnarar eller alliansar.
• Forskarar med ønske om å samarbeide i konkrete senter-initiativ.
• Representantar for industri/offentleg sektor som vurderer samarbeid med ein eller fleire kandidatar til KI-senter. 

Begge dagane blir todelte. Ein del med munnlege lyn-framføringar ("pitch") i plenum før lunsj og matchmaking etter lunsj. 

Om pitch

• Pitchane blir strøymde og lagra.
• Du som framfører må vere fysisk til stades. Det blir ikkje høve til å vise power point. Det er plass til ca. 10 pitchar i kvar bolk. Du som skal presentere står klar i rekkjefølgje på podiet.
• Du får snakke i 2 minutt (på norsk eller engelsk) og gir så mikrofonen til neste i rekkja. Ein tilretteleggjar passar tida. 

Det kan vere nyttig å ta med ein presentasjon på ei side (eit papirark), som du kan dele ut til dei som deltek. Bruk gjerne same mal og struktur som pitchen. 

Koplingsdelen/Matchmaking blir friare og krev at du er fysisk til stades.

Pitche-presentasjonane skal ha følgjande form

• Førebu ei framføring på to minutt. Du når flest om du gjer det på engelsk.
• Fortel først kva du heiter og kva institusjon du kjem frå.
• Oppgi tittel på KI-senteret og gi ein kort introduksjon til fagområde og motivasjon for senteret.
• Fortel om kvifor du deltek på møteplassen. Kva ser du etter? (partnarar frå andre område eller institusjonar? Andre typar samarbeid?)
• Sei også gjerne noko om forventningane du har til dagen. Din motivasjon for å delta.

Om matchmaking

Vi brukar ein uformell "World Cafe"-modell der kvar pitchar får eit bord som alle kan besøkje. Deltakarane går fritt rundt frå bord til bord. For å sikre flyt blir sesjonane delte opp i 15 minutts-bolkar. Når bjølla ringjer, går du vidare til neste bord. 

Matchmaking-sesjonen har relativt romsleg med tid, slik at det skal vere opning for uformelle møte med andre deltakarar, eller ein prat med oss frå administrasjonen i Forskingsrådet som er til stades.

Lenke for å følgje møtet digitalt

• Lenke for å følge møtet digitalt - dag 1
• Lenke for å følge møtet digitalt - dag 2