Digitalt innspelsmøte: Styrking av forsking på kvanteteknologi i Noreg

Ei ny satsing på 70 millionar kroner årleg har som mål å byggje opp solide, konkurransedyktige norske fagmiljø av høg internasjonal kvalitet innan kvantedatabehandling og simulering, kvantesensorar og målingar, og kvantekommunikasjon.

I statsbudsjettet foreslår regjeringa å styrkje forskinga på kvanteteknologi med 70 millionar kroner årleg frå 2025:

«Satsinga skal innrettast slik at det blir bygd opp solide nasjonale fagmiljø av høg internasjonal kvalitet, som vil kunne konkurrere og lykkast på andre arenaer. Tilskot til forskingsinfrastruktur kan inngå i ramma for satsinga.»

«Satsinga er venta å gi ei varig oppbygging av fagmiljø som forskar og underviser på dei tre hovudspora innan kvanteteknologi: kvantedatabehandling og simulering, kvantesensorar og målingar, og kvantekommunikasjon.»

Forskningsrådet har fått i oppdrag av Kunnskapsdepartementet å setje forskingssatsinga ut i livet. Som del av det førebuande arbeidet ønskjer vi innspel frå relevante aktørar i forskings- og innovasjonssystemet til utforminga av satsinga.