Noreg brukte 94,4 milliardar kroner på forsking og utvikling i 2024. Justert for pris- og lønnsvekst er det ein nedgang på nesten fem prosent frå året før. Samtidig heldt forskingsinnsatsen fram med å vekse i OECD-landa, viser Indikatorrapporten 2026.
For første gong sidan 1970 var det ingen nominell vekst i Noregs samla utgifter til forsking og utvikling (FoU) i 2024. Nedgangen målt i faste prisar omfattar både næringslivet, instituttsektoren og universiteta og høgskulane.
Næringslivet har dei siste åra vore vekstmotoren i norsk forsking. I 2024 fall FoU-utgiftene til bedriftene med nær seks prosent, justert for pris- og lønnsvekst.
– Rapporten viser ein brei nedgang i forskingsinnsatsen. Eitt år åleine er ikkje nok til å slå fast eit trendbrot, men utviklinga gir grunn til å følgje nøye med. Samtidig har Noreg sterke forskingsmiljø og gode resultat å byggje vidare på, seier administrerande direktør i Forskingsrådet, Mari Sundli Tveit.
Færre forskingsårsverk, men sterke resultat
Også antallet FoU-årsverk gjekk ned i 2024. Nedgangen, på om lag fire prosent, er den første registrerte nedgangen i samla FoU-årsverk i historia til den norske statistikken.
Internasjonalt var utviklinga ein annan. Førebelse tal viser at FoU-utgiftene i OECD-landa auka med 2,6 prosent i faste prisar i 2024. Noregs FoU-utgifter utgjorde 1,75 prosent av bruttonasjonalproduktet, mot 2,7 prosent for OECD samla.
Rapporten viser fleire norske styrkar:
- Gjennomslag i Europa: Norske aktørar hadde per juni 2026 henta inn nesten 1,9 milliardar euro frå Horisont Europa. Suksessraten var høgare enn gjennomsnittet for alle land.
- Høg vitskapleg produksjon: Målt per innbyggjar publiserer berre Danmark og Sveits fleire vitskaplege artiklar enn Noreg.
- Ny kunnskap blir teken i bruk: Norske publikasjonar vart siterte 18 prosent meir enn verdsgjennomsnittet i perioden 2023–2024.
Indikatorrapporten gir eit samla bilete av norsk forsking og innovasjon og samanliknar utviklinga med andre land. Årets rapport har innovasjon og innovasjonsevne som tema. Les Indikatorrapporten 2026.