Meir enn 400 personar ville bli medlem av det vitskaplege rådgivande utvalet i den felles europeiske plattforma for open publisering, Open Research Europe. No har Jan Magnus Aronsen ved Universitetet i Oslo sikra seg ein av plassane i utvalet.
Jan Magnus Aronsen, førsteamanuensis ved Universitetet i Oslo, blir no medlem av det nyoppretta Scientific Advisory Board i Open Research Europe (ORE).
ORE er ei publiseringsplattform for open publisering basert på diamantmodellen. Plattforma er støtta av EU-kommisjonen og blir drifta av eit samarbeid mellom CERN og ei rekke europeiske forskingsfinansiørar, inkludert Forskingsrådet. I løpet av hausten vil norske forskarar få høve til å publisere ope utan å betale publiseringsavgift.
Det vitskaplege rådgivande utvalet skal bidra til den vidare utviklinga av plattforma, som vart etablert for å møte utfordringane ved dagens system for vitskapleg publisering og sikre open publisering og tilgang til vitskaplege publikasjonar.
— Målet med ORE er å gjere forsking tilgjengeleg for alle, utan at dei som publiserer og lesar må betale for det. Med Aronsen i det vitskaplege rådgivande utvalet, i tillegg til Forskingsrådets deltaking i det styrande organet, har Noreg eit godt utgangspunkt for innverknad på den vidare utviklinga av plattforma, seier administrerande direktør i Forskingsrådet Mari Sundli Tveit.
ORE inviterte søkjarar til å melde interesse før sommaren, og fekk inn meir enn 400 søknader. Til saman er det 22 plassar i utvalet.
Aronsen jobbar til dagleg som eksperimentell kardiolog ved Institutt for medisinske basalfag ved UiO. Han har vore styremedlem i Forskingsrådet og leiar av Akademiet for yngre forskarar. Han har hatt fleire faglege roller innan open forsking, særleg knytt til Fair-prinsippa for opne data.