Miljøvennleg energi: 675 millionar kroner til nye prosjekt i 2027

Forsking og utvikling på miljøvennleg energi er eit høgt prioritert område i Noreg. I 2027 vil det bli lyst ut om lag 675 millionar kroner til prosjekt innanfor dette temaet.

Grønne busker i bakgrunnen og noen som holder en lyspære som lyser kraftig.

Mesteparten av midlane går til ei stor ny felles utlysing: Energiomstilling, energisikkerhet eller energirelaterte sirkulære løsninger som handlar om forsking og innovasjon for større konkurransekraft i næringar som jobbar med energiomstilling, energisikkerheit og energirelaterte sirkulære løysingar.

Med den nye utlysinga ønskjer Forskingsrådet å styrkje norsk næringsrelevant forsking og utvikling som bidreg til nye lågutsleppsløysingar, auka fornybar energiproduksjon, redusert energi- og ressursbruk og som varetek energisikkerheit, natur og miljø.

Utlysinga har ei ramme på i overkant av 500 millionar kroner og vil vere open for ei rekke tema innanfor miljøvennleg energi, i tillegg til energisikkerheit og sirkulære løysingar med relevans for energiomstillinga. 

Større konkurransekraft og meir samarbeid, også mellom sivil og militær sektor

Prosjekta skal bidra til å gjere norske bedrifter meir konkurransedyktige, utløyse private FoU-investeringar og styrke samarbeidet mellom bedrifter og forskingssektoren, også mellom sivile og militære forskings- og innovasjonsmiljø.

Utlysinga femnar breitt, frå langsiktig kompetanse- og kunnskapsutvikling til utvikling av nye løysingar og ny teknologi.

Utlysinga er eit samarbeid mellom porteføljestyra for Energi og transport, Klima og miljø og Forsvarsevne, sikkerheit og beredskap.

Hovuddelen av midlane skal gå til prosjekt innanfor miljøvennleg energi, men samarbeidet med dei andre porteføljane opnar for at prosjekt som omfattar energisikkerheit og sivilt-militært samarbeid og prosjekt innanfor energirelaterte sirkulære løysingar også kan søkje.

Både bedrifter og forskingsorganisasjonar kan søkje

Alle prosjekt må inkludere norske bedrifter og forskingsorganisasjonar. Begge typar organisasjonar kan søkje og dermed stå som prosjektansvarleg. Valet her vil avhenge av i kva grad det skal vere open forsking som kan delast, eller forsking som bedrifta skal ha rettane til.

Prosjekta kan i tillegg ha med samarbeidspartnarar både frå offentleg sektor, næringsliv og frivillige organisasjonar.

Vi tek imot søknader fortløpande frå midten av januar 2027 og fram til utlysinga blir stengt 15. september 2027. Alle som sender inn søknad innan 1. mars, vil få svar i juni.

Grøn og rettferdig omstilling

I 2027 vil vi også ha ei stor utlysing for prosjekt innanfor «Grønn og rettferdig omstilling». Utlysinga omfattar mellom anna temaet energiomstilling og konsekvensar for samfunnet. Utlysinga vil vere aktuell for prosjekt både med og utan deltaking frå brukarpartnarar.

Oppfølging av Rapporten frå sannings- og forsoningskommisjonen

Merk også at det igjen blir ei eiga utlysing for problemstillingar som berører tematikk tekne opp i Rapporten frå sannings- og forsoningskommisjonen, med søknadsfristfrist våren 2027.

Prosjekt må ta utgangspunkt i rapporten frå kommisjonen og omhandle mellom anna forskingsområda energiomstilling, energiinfrastruktur og natur- og arealforvaltning.

Forsking for samfunnssikkerheit og beredskap 

I 2027 kjem ei ny utlysing retta mot prosjekt innanfor samfunnssikkerheit og beredskap, med søknadsfrist på våren.

Utlysinga vil ha to overordna tema og fleire underpunkt med ulik tematikk. Tematikken inkluderer mellom anna energiforsyningssikkerheit og digital og fysisk sikring av kritisk energiinfrastruktur, under dette kunnskap om flaum og skred.

Internasjonalt samarbeid 

I 2027 vil det dessutan vere mogleg å søkje om nordiske samarbeidsprosjekt gjennom programmet Nordic Energy Solutions. Denne utlysinga vil vere open for søknader frå forskingsmiljø som har med bedriftspartnarar i konsortiet.

Nordic Energy Solution skal støtte ei effektiv grøn omstilling med sikker, rimeleg og fossilfri energi, i tillegg til løysingar som aktivt bidreg til Nordisk ministerråds mål om ein karbonnøytral nordisk region.

Vidare skal programmet styrkje berekraft og energisikkerheit, vidareutvikle nordiske konkurransefortrinn på energiområdet og styrkje kompetansebygging, i tillegg til å bidra til eit klimanøytralt og fossilfritt nordisk energisystem.

Utlysinga blir publisert på nettsidene til Nordisk energiforsking i november. Totalt kunngjort beløp er om lag 70 millionar kroner. Søknadsfristen blir 17. mars 2027.

I tillegg blir utlysinga vidareført frå eit anna nordisk forskingsprogram, Nordic Energy Systems Programme som skal styrkje nordisk innsats innan energisystemmodellering. Den vil truleg ha frist i april 2027.

EUs partnarskap Clean Energy Transisjon Partnership (CETP) kjem med ny utlysing i 2027 med søknadsfrist for såkalla pre-proposals i oktober neste år. 

Utlysinga blir publisert mai. Tilgjengeleg budsjett for norske søkjarar blir om lag 50 millionar kroner innanfor miljøvennleg energi og det same innanfor CO2-handtering.

Start søknadsarbeidet no og bli med på webinar

Over har vi oppsummert det vi veit per i dag. Vi oppmodar alle som vil søkje til å starte arbeidet med å konkretisere prosjekta og etablere gode konsortium. Følg med på nettsidene våre der utlysingstekstane vil bli publiserte fortløpande med meir informasjon.

Allereie no kan du melde deg på søkjarwebinar 4. desember kl. 10, der vi presenterer den nye utlysinga Energiomstilling, energisikkerheit eller energirelaterte sirkulære løysingar og svarer på spørsmål.

21. januar kan du igjen få med deg eit søkjarwebinar, når vi byrjar å ta imot søknader. Her vil vi svare på spørsmål de har når de arbeider med søknaden.

Les utlysingane nøye, særleg sidan det er ein del viktige endringar i 2027 samanlikna med tidlegare år.

Dersom de har sendt oss søknad tidlegare, ver merksame på at de no skal bruke Forskingsrådets nye søknadssystem og -skjema, via Min side når du loggar inn på nettsida. For søknader til dei internasjonale utlysingane, sjå nettsida vår for lenke til dei relevante internasjonale plattformene.

Meldinger ved utskriftstidspunkt 16. november 2026, kl. 11.47 CET

Det ble ikke vist noen globale meldinger eller andre viktige meldinger da dette dokumentet ble skrevet ut.