Tidenes norske ERC-resultat
I dag blir ERC Synergy grant for 2023 gjort offentleg. Seks norske forskarar får finansiering, med ei samla tildeling på 22,2 millionar euro. Forskarane er tilsette ved UiT Norges arktiske universitet, NTNU og Universitetet i Oslo og Norce.
– Dette er fantastiske resultat. Norske forskarar hevdar seg svært godt i den tøffe internasjonale konkurransen. Internasjonalt samarbeid og brei deltaking i dei europeiske forskings- og innovasjonsarenaene er ein føresetnad for at vi kan hevde oss som ein kunnskapsnasjon og lykkast med omstillinga av samfunnet, seier forskings- og høgare utdanningsminister Sandra Borch.
Dette er den sjuande Synergy grant -utlysinga i historia til ERC. I eit 'synergy grant' er det 2-4 forskarar, såkalla Principal Investigators, som går saman om å løyse eit spørsmål som dei ikkje kunne løyst utan felles kompetanse. Seks norske forskarar får finansiering, i fem ulike prosjekt. Universitetet i Oslo får eitt prosjekt, NTNU to prosjekt, UiT Norges arktiske universitet eitt prosjekt, og eitt prosjekt går til UiT Norges arktiske universitet saman med Norce.
– Dette er utruleg bra og tidenes norske ERC resultat! Her samarbeider forskarane på tvers av landegrenser, og løyser store utfordringar som berre kan løysast gjennom samarbeid, seier administrerande direktør i Forskingsrådet Mari Sundli Tveit.
Totalt er det 37 prosjekt med til saman 135 Principal Investigators som får tilbod om finansiering. Samla budsjett for prosjekta er på 395 millionar euro.
Kort om prosjekta
- Professor Nils Chr. Stenseth ved Universitetet i Oslo får saman med tre forskarar frå University of Stirling (UK), University of Cambridge (UK) og Institute National de la Santé et de la Recherche Medicale (Frankrike) 10 millionar euro til prosjektet "Reconstructing the environmental, biological, and societal drivers of plague outbreaks in Eurasia between 1300 and 1900 CE".
Les omtale av prosjektet: Får over 118 millionar kroner til å forska på pestutbreiing (uniforum.uio.no)
- Professor Brita Elvevåg ved Universitetet i Tromsø får saman med tre forskarar ved Academisch Ziekenhuis Groningen (Nederland), Universitat Pompeu Fabra (Spania) og University of Zürich (Sveits) 9,9 millionar euro til prosjektet "The Delta of Language".
- Forskar Jochen Knies ved Universitetet i Tromsø og forskar I Stijn De Schepper ved NORCE får saman med ein forskar ved Alfred-Wegener-Institut Helmholtz-Zentrum für polar- und meeresforschung (Tyskland) 12,5 millionar euro til prosjektet "Into the Blue - Resolving past Arctic greenhouse climate".
Les omtale av prosjekta ved UiT: UiT får over 260 EU-millionar til synergi (uit.no) - Professor James R. Dawson ved NTNU får saman med tre forskarar ved TU DARMSTADT (Tyskland), ETH Zürich (Sveits) og CNRS (Frankrike) 12,7 millionar euro til prosjektet "Hydrogen under pressure".
Les omtale av prosjektet: Rene gassturbiner mottar 12,7 millioner euro (gemini.no) - Professor Thorsten Hamann ved NTNU får saman med tre forskarar ved Tel Aviv University, University of Regensburg og University of Nottingham 9,8 millionar euro til prosjektet "Discovering how plants sense water stress".
Les omtale av prosjektet: EU-millioner for å sikre matforsyningen mot tørke (gemini.no)
Sjå liste over alle prosjekta som fekk støtte frå ERC Synergy grant ( pdf hos eerc.europa.eu)
Meldinger ved utskriftstidspunkt 9. mai 2024, kl. 17:03 CEST