Forskingssamfunn
Feltforsking går føre seg over heile Svalbard-øygruppa. Berre i 2023 var forskarar frå meir enn 30 ulike land registrert med aktive prosjekt hos Research in Svalbard (RiS). Dei fleste forskingsprosjekta spring ut frå eitt av dei fire permanent bemanna forskingssamfunna på Svalbard.
Dei fire permanent bemanna forskingssamfunna på Svalbard er:
Ny-Ålesund forskingsstasjon er det mest internasjonale forskingsmiljøet. Norsk Polarinstitutt er leiar av forskingsstasjonen, og Kings Bay AS er grunneigar, tryggleiks- og logistikkansvarleg. I samarbeid tek dei imot norske og utanlandske forskarar. Institusjonar frå ti ulike land leiger bygg i Ny-Ålesund frå Kings Bay AS, og har anten fast bemanning heile året, eller jamleg, sesongmessig aktivitet.
Longyearbyen er det administrative sentrumet på Svalbard. Her finn du Forskingsparken, som i tillegg til Svalbard Forskningskontor huser dei to viktige forskingsinstitusjonane på Svalbard: Universitetssenteret på Svalbard (UNIS) og Norsk Polarinstitutt. Nokre internasjonale forskingsinstitusjonar samt SIOS har også kontor i Forskningsparken. Den tsjekkiske arktiske forskingsstasjonen ligg i nærleiken og har ein feltstasjon i Billefjorden. EISCAT Svalbard Radar ligg på Breinosa, ca. 12 km frå Longyearbyen.
Barentsburg, ei busetjing driven av det russiske kolgruveselskapet Trust Arcticugol, er også eit knutepunkt for russisk forsking på Svalbard. Fleire institusjonar knytte til Det russiske vitskapsakademiet (RAS) og Den føderale tenesta for hydrometeorologi og miljøovervaking i Russland (Roshydromet) driv forskings- og overvakingsprogram i Barentsburg.
Den polske polarstasjonen Hornsund vart etablert i 1957 og har vore i drift heile året sidan 1978. Den blir driven av Institutt for geofysikk ved Det polske vitskapsakademiet i Warszawa, Polen. Den faste staben til stasjonen består av åtte–ti personar som er tilsette for eit heilt år.