Sustainable Pathways – samarbeid mellom Noreg og India innan forsking, utdanning og innovasjon

Denne våren passerte India Kina som det mest folkerike landet i verda, og samtidig er landet på veg fram som ein av dei raskast veksande økonomiane. Kva kjenneteiknar forskingssamarbeidet mellom Noreg og India og korleis kan ein skape berekraftige samarbeidskanalar mellom dei to landa i møte med eit geopolitisk verdsbilete i stadig endring? 

Den 12. juni inviterer Forskingsrådet og Utanriksdepartementet inn til konferanse for å gi nokre svar på desse spørsmåla.

Konferansen er meint å synleggjere satsingar for norsk-indisk samarbeid innan forsking, utdanning og innovasjon, og dessutan å setje dette samarbeidet inn i ein større geopolitisk samanheng. Innleiingar vil bli gitt av minister for forsking og høgare utdanning, Ola Borten Moe, utanriksminister Anniken Huitfeldt og administrerande direktør i Forskingsrådet, Mari Sundli Tveit. 

Gjennom dagen vil ein også få glimt av samarbeidet mellom India og Noreg, både i og utanfor forsking. Dei som ønskjer å vise fram døme på forskingssamarbeidet sitt med India blir oppmoda til å melde seg på poster-sesjonen.